Inicio do Congreso Valentín Paz-Andrade
14/12/2012
Onte deu comezo o congreso Valentín Paz-Andrade que culmina o seu ano das Letras Galegas. Ramón Villares, presidente do Consello da cultura galega, foi o responsable da lección inaugural que titulou "Paz-Andrade na luz e na sombra" na que destacou tres aspectos fundamentais da traxectoria de Valentín: a súa constante aportación á política galeguista, a súa condición de interprete de asuntos económicos galegos e a súa vontade de proxección internacional de Galiza moi especialmente coa cultura luso-brasileira. "Un home que preferiu "facer" a "ser""
Outros ponentes da xornada como Tucho Calvo fixeron fincapé na fidelidade de Valentín ao pensamento galeguista republicano ou outros como Luís Cochón repasaron a relación de Valentín cos seus coetáneos durante o franquismo como Dia Pardo, Fernández del Riego ou Ramón Piñeiro.
Emilia García López mostrounos algúns datos do proxecto no que está inmersa, a edición dos diarios de viaxe de Valentín Paz-Andrade da man da editorial Alvarellos.
Na sesión vespertina, a biógrafa de Valentín Charo Portela explicou polo miúdo a relación que Paz-Andrade tivo con Pontevedra, a súa cidade natal e Xan Carballa coa súa ponencia "Os vellos galeguistas nunca morren" retratou a Valentín enmarcado nunha xeración de incansables que seguiron en activo até o último día.
Miguel Anxo Seixas repasou a relación de Valentín con Castelao e coa súa memoria mentres que Luís Bará, quen fechou a xornada enmarcou a Paz-Andrade entre dúas cidades no período de preguerra: Vigo e Pontevedra.
Nos próximos días iremos dispoñibilizando os vídeos das ponencias do congreso nesta páxina, mentres podedes seguir o congreso en Twitter a través do hashtag #congresovpa ou mediante o resumo das xornadas no web da Real Academia Galega